ލަރނިންގ ތިއަރީތަކުގެ އަލީގައި އަޅުގަނޑު ކިޔަވައިދިނުމުގައި ގެންގުޅޭނެ ފަލްސަފާ

ތަޢާރަފް                 

ކިޔަވައި ދިނުން ނުވަތަ އުނގަންނައި ދިނުމަކީ ފަސޭހަ ކަމެއް ނޫނެވެ. ދަރިވަރުންނަށް މަޢުލޫމާތުތަކެއް ފޯރުކޮށްދީ، ކުދިންގެ އުޅުމަށް ބަދަލެއް ގެނައުމަށްޓަކައި ޓީޗަރުން، އެމީހުންގެ މަސައްކަތް ބިނާކުރަންޖެހޭނީ ވަރަށް ވިސްނުންތެރިކަމާ ފަރުވާތެރި ކަމާއެކުގައެވެ. އެހެން ނޫންކަމުގައިވާނަމަ ކުދިންނަށް އުނގެނުމަށް ފަހި މާހައުލެއް ގާއިމެއް ނުކުރެވޭނެއެވެ. ކާމިޔާބު މުދައްރިސަކަށް ވުމަށްޓަކައި ގިނަގުނަ މަސައްކަތްތަކެއް ކުރަންޖެހެއެވެ. ދަރިވަރުންގެ ޝައުޤުވެރިކަން ހޯދޭނީ ކިޔަވައިދޭ މުދައްރިސެއްގެ ކިބައިގައި ޚާއްޞަ ސިފަތަކެއް ހުރެގެންނެވެ. ރަނގަޅު މުދައްރިސެއްގެ މަސްއޫލިއްޔަތަކީ އުގެނމުގައި އެހީވެދިނުމެވެ. މިކަމާގުޅިގެން އެންމެ މުހިއްމު އަހައްމިއްޔަތެއް ދޭންޖެހެނީ ކުދިންގެ މަސައްކަތްތައް ރާވާ ހަމަޖެއްސުމެވެ. މިކަންކުރަންވާނީ ކުދިން ގަޔާވެ ޝަޢުޤުވެރިވާފަދަ ގޮތެއްގައެވެ.

އެހެންކަމުން އުނގެނުމަށް ފަހިކަން ހޯދައިދީ، ދަރިވަރުން އުނގެނޭ މިންވަރު އިތުރުކުރުމަށްޓަކައި ސައިކޮލޮޖިސްޓުންވަނީ، ތަފާތު ތިއަރީ ތަކެއް ނުވަތަ އުސޫލުތަކެއް ބަޔާންކުރައްވާފައެވެ.  މިކަމުގެ ޢިލްމުވެރީން ފާޅުކޮށްފައިވާ ކިޔަވައިދިނުމާ ގުޅޭ ތިއަރީތަކުން ރަނގަޅު ކަންތައްތަކާއި ނުރަނގަޅު ކަންކަން ފާހަގަކުރެވުނެވެ. އެ ކަންތައްތަކުގެ އަލީގައި ކިޔަވައިދިނުމަށްޓަކައި އަމިއްލަ ފަލްސަފާއެއް ކަނޑައެޅުމަކީ ކިޔަވައި ދިނުމުގެ މައިދާނުގައި ހަރަކާތްތެރިވާ ކޮންމެ މީހެއްގެ ވާޖިބެއްކަން އަޅުގަނޑު ދެކެމެވެ.

މައިގަނޑު                                     

އަޅުގަނޑުގެ ނަޒަރުގައި އުނގަންނައިދިނުމުގައި ފަލްސަފާއެއް ގެންގުޅޭނަމަ ގެންގުޅެންވާނީ ރަނގަޅު ޖީލެއް ބައްޓަންކޮށް ޤައުމަށާއި އުނގެނޭދަރިވަރުންގެ ނަފުސަށް އެންމެ ފައިދާހުރިގޮތެއްގެ މައްޗަށް ބިނާކޮށެވެ. އެގޮތުން އަޅުގަނޑު އަބަދުވެސް އެންމެ އިސްކަންދޭނީ ސުލޫކަށެވެ.

ބިހޭވިއަރ ލަރނިން ތިއަރީ ގުޅިފައިވަނީ މާހައުލުގައި ކުރާ ތަޖްރިބާތަކާއި ޙިއްޞާކުރާ ޙިއްސާކުރުންތަކާއެވެ. މި ތިއަރީގައިވާގޮތުން އެއްކަމެއް އަބަދު ތަކުރާރުކުރުމުން، ދަސްކުރުމަށް ފަސޭހަވެގެންދެއެވެ. ހަމަމިއާއެކު، ދަރިވަރުން އުޅޭ ހާލަތަށް ހޭނުމުގެ ސަބަބުން، ދަސްކުރުމަށް އިތުރަށް ފަސޭހަވެގެންދެއެވެ. މީގެއިތުރުން، ދަރިވަރުންނަށް ޕޮޒިޓިވްކޮށްނާއި ނެގެޓިވްކޮށް ރިއިންފޯރސްމަންޓް ދިނުމުގެ ސަބަބުން، ދަރިވަރުންގެ މަސައްކަތްތައް ކުރިއަށްގެންދިއުމަށް ލިބޭ ހިތްވަރަކަށް ވެގެންދެއެވެ. މި ތިއަރީގެ ވަރުގަދަ ޕޮއިންޓްތަކަށް ބަލައިލާއިރު، މީހުންގެ ފަރާތުން ފެންނަ ކަންތައްތައް ވަރަށް އަވަހަށް ދަސްކޮށްލާކަމަށް ފާހަގަކުރެވިފައިވެއެވެ. ހަމަމިއާއެކު، ކުދިންނަށް ޓެސްޓްތައް ދިނުމުން އެނގޭމިންވަރު ވަޒަންކުރެވޭކަމަށްވެސް ބެލެވިފައިވެއެވެ. އެހެންނަމަވެސް، ޓެސްޓްތައް ދީގެން ކުދިންގެ ޙަޤީޤީފެންވަރު ވަޒަން ނުކުރެވޭނެ ކަމަށާއި އުޅޭ މާހައުލުން ރަނގަޅު ކަންތައްތަކެއް ނުފެންނަނަމަ އުނގެނުމަށް އަސަރުކުރާކަމަށް ބެލެވިފައިވެއެވެ. އެހެންކަމުން، މި ތިއަރީގެ ބޭނުން އަޅުގަނޑު ކުރާއިރު، ދަރިވަރުންނަށް ރަނގަޅު ނަމޫނާ ދެއްކުމަށާއި ފެންވަރު ވަޒަންކުރުމަށް ކުލާސް ރޫމް، ޓެސްޓާއި، ހޯމްވޯކާއި، އެސައިންމަންޓް ހަވާލުކުރުމަކީ އަޅުގަނޑުގެ ފަލްސަފާގެ މައިގަނޑު އަސާސެކެވެ. އަދި ހޯދާ ނަތީޖާ ތަކަށް ޕޮޒިޓިވް ކޮށްނާއި ނެގެޓިވްކޮށް ރިއިންފޯރސްމަންޓްދޭނަމެވެ. އެއީ އެކި ގޮތްގޮތުން ދަރިވަރުން ކުރިއަރުވާ،އެކުދީންގެ ކިޔެވުމުގެ ފެންވަރު ވަޒަންކުރުމަށްޓަކައެވެ.

ޝައުޤުވެރިކަމާ ގުޅޭ ތިއަރީއާ ބެހޭގޮތުން ބީ. އެފް. ސްކިނަރ (1971) ޤަބޫލުކުރަނީ ކުދިންގެ ކިބައިން ފެންނަ ރަނގަޅު ކަންކަމަށް ހިތްވަރުދީ ތަރުހީބުދީ ހެދުމުން، އެކުދިންގެ އެކަންކަން ތަކުރާރުކުރުމަށް ޝައުޤުވެރިވާނެކަމަށެވެ. މިގޮތުން، އިނާމުދީ ހެދުމުން އެކުދިންގެ މަސައްކަތަށް އިތުރު ޝައުޤުވެރިކަމެއް ގެނުވާ ކަމަށެވެ. ހަމަމިއާއެކު، އަލްބަރޓް ބަންދޫރާ (1977) ޤަބޫލުކުރާ ގޮތުގައި ކުދިން ދަސްކުރަނީ ބަލައިގެން، ނަކަލުކޮށްގެން، އެހެންމީހުންގެ ތަޖުރިބާތައް އަޑުއަހައިގެންކަމަށެވެ. އެހެންކަމުން، މި ތިއަރީއަށް ބަލާއިރު، ދަރިވަރުންގެ ދަސްކުރުމުގެ ފެންވަރު އިތުރުކުރުމަށްޓަކައި ތަރުހީބުދީ، ވީހާވެސް ބޮޑަކަށް ދަރިވަރުން ޝައުޤުވެރިކުރުމަށްޓަކައި އެކިރޮނގުރޮނގުން ކަންތައްތައް ކުރުން މުހިއްމުކަން ހާމަވެއެވެ. ވީމާ، މި ތިއަރީގެ ބޭނުންކުރާ އިރު އެހެން ތިއަރީތަކުގެ ފައިދާތަކަށް ރިއާޔަތްކުރުމާއެކު، ދަރިވަރުން ޝައުޤުވެރިކުރުމަށްޓަކައި، ކުދިންކުރާ ރަނގަޅުކަންކަމަށް ވީހާވެސް ބޮޑަކަށް ތަރުހީބުދީ، ރަނގަޅު ނަމޫނާތަކެއް ދައްކައިދިނުމަށް އަޅުގަނޑު ވަރަށް ބޮޑަށް އިސްކަމެއްދޭނަމެވެ.

ކޮންސްޓްރަކްޓިވިޒަމް ތިއަރީ ބިނާވެގެންވަނީ ޖޭން ޕިއާޖޭ އާއި ވައިގޮޓްސްކީގެ ތިއަރީގެ މައްޗަށެވެ. މި ތިއަރީގައި ބުނާގޮތުން ދަރިވަރުން މައުލޫމާތު އުނގެނެނީ ކުރިން އެނގިފައިވާ އެއްޗަކާ ގުޅުވާލައި އެއްކޮށްލައިގެންނެވެ. ހަމަމިއާއެކު، އުނގެނުމަކީ ދަރިވަރު އުޅޭ މާހައުލުންނާއި ވިސްނުމުގެ މަރުހަލާތަކާ ގުޅޭގޮތުން ކުރިއަރާ ބިނާވަމުންދާ އެއްޗެއްކަމަށް ވެސްވެއެވެ. ޕިއާޖޭ ޤަބޫލުކުރަނީ ކުއްޖާ ބޮޑުވަމުން އަންނަވަރަކަށް އެކުއްޖާގެ ވިސްނުންވެސް ތަފާތުވަމުން އަންނަކަމަށެވެ. ހަމަމިއާއެކު، ވައިގޮޓްސްކީ ދެކެނީ ކުއްޖާގެ ވިސްނުން ތަރައްޤީވަމުން އަންނަނީ ކުއްޖާ އުޅޭ ޘަޤާފީ އިޖްތިމާއީ މާހައުލުގެ އަސަރުންކަމަށެވެ. އެހެންކަމުން ދަރިވަރުންނަށް ރަނގަޅު ނަމޫނާއެއް ދެއްކުން މިއީ ވަރަށް މުހިއްމުކަމެއްގެ ގޮތުގައި މި ތިއަރީގައި ފާހަގަކުރެވިފައިވެއެވެ. ވީމާ، ދަރިވަރުންނަށް ރަނގަޅު ނަމޫނާއެއް ދެއްކުމަށާއި ކުރިން ދަސްވާ އެއްޗަކީ ބޭނުންތެރި އެއްޗަކަށް ހަދައިދީ، ދަރިވަރުންގެ އުމުރު މަތިވަމުން ދިޔަވަރަކަށް ވިސްނަންޖެހޭ ފެންވަރު މަތިކޮށް އުނގެނޭ އެއްޗެތި ވެސް ތަފާތުކުރުމަށް ސަމާލުކަން ދިނުމަކީ ކިޔަވައިދިނުމުގައި އަޅުގަނޑު  ގެންގުޅޭނޭ އެއްފަލްސަފާއެކެވެ.

  ކިޔަވައިދިނުމާއި ކުލާސްމެނޭޖުކުރުމުގައި އަޅާފިޔަވަޅުތަކަކީވެސް ކުދިންގެ ސްލޫކަށް އަސަރުފޯރާކަންކަމެވެ. އެހެންކަމުން އުނގަންނައިދިނުމުގަޔާއި ކުލާހުގެ އެކިއެކި ކަންކަން ރާވާ ހިންގުމުގައި ބޭނުންކުރެވޭ ގޮތްތަކަކީ ނުހަނު ސަމާލުކަންދޭންޖެހޭކަންކަމެވެ. ފަރުވާތެރިކަމާއެކު ބޭނުން ކުރެވިއްޖެނަމަ ރަނގަޅު ނަތީޖާ ނެރެވޭނެ ދެތިން ހަތަރު ގޮތެއް ސުލޫކީ ނަޒަރިއްޔާގައިވެއެވެ. އެއީ ގްރޫޕް ކޮންސިކުއެންސާއި ކޮންޓިންޖެންޓް ކޮންޓްރެކްޓާއި ޓޯކަން އަދި އޮބްޒަވޭޝަނަލް ލާރނިންގ އެވެ. ކޮންސިކުއެންސް ބޭނުންކޮށްގެން ކުލާހުގައި ތިބޭ ވަކި ސުލޫކީ މައްސަލަ އުޅޭ ދަރިވަރުންނަށް އެދެވޭ ބަދަލެއް ގެނެވިދާނެއެވެ. މި އެގޮތުން ކުލާސްތައް ގްރޫޕްކޮށް މާކުސެއް ދީގެން މިކަން ގެންދެވިދާނެއެވެ. ހަމައެހެންމެ ކޮންޓިންޖެންޓް ކޮންޓްރެކްޓެއްގެ ދަށުން ދަރިވަރުން ކުރަންޖެހޭ ކަންކަން ބަޔާންކޮށްދިނުމަށްފަހު އެގޮތަށް އަމަލުތައް ބަހައްޓައިފިނަމަ ލިބޭނެ އިނާމެއް ބުނެވިދާނެއެވެ. އަދި ޓޯކަންއެއްދީގެން ސުލޫކު ރަނގަޅުކުރުމަށް މަސައްކަތްކުރެވިދާނެއެވެ. މީގައި ކަނޑައެޅޭ ގޮތަށް ދަރިވަރު ޢަމަލުތައް ބަހައްޓައިފިނަމަ އޭނާ ބޭނުންވާ ތަފާތުކަންކަން ކޮށްދޭގޮތަށް ހަމަޖެއްސިދާނެއެވެ.
ނިންމުން
މި ތިއަރީތަކުން އެންމެ ބޮޑަށް ފާހަގަކުރެވިގެން ދިޔައީ ދަރިވަރުންނަށް އުނގެނުމަށްޓަކައި ވަރަށް ރަނގަޅު ނަމޫނާއެއް ދައްކާއިގެން ކިޔަވާއި ދިނުމަކީ ވަރަށް އެދެވިގެން ވާކަމެއްކަމެވެ. ހަމަމިއާއެކު، ދަރިވަރުން ކުރާ ރަނގަޅު ކަންކަމަށް ތަރުހީބުދީ އެކަންކަން ވަޒަންކުރުމަކީ ނުހަނު ބޭނުން ތެރިކަމެއް ކަން ވަރަށް ބޮޑަށް ހާމަވިއެވެ. ދަރިވަރުންގެ ސްލޫކާމެދު މި އަލިއޅުވާލެވުނު ކަންކަމުގެ އަލީގައި ވިސްނައި ފިޔަވަޅު އެޅިއްޖެނަމަ ކިޔަވައިދިނުމުގައި ކާމިޔާބުވެފައި މަޤްޞަދު ޙާޞިލުކުރަން ފަސޭހަވާނެއެވެ. ހަމައެހެންމެ އުނގެނުމުގެ އެންމެ މުހިއްމު މަޤްޞަދުކަމަށްވާ ކުއްޖާގެ އުޅުމަށާއި ވިސްނުމާއި ފިކުރަށް ހެޔޮ ބަދަލުގެންނަން ފަސޭހަވާނޭކަމަށް އަޅުގަނޑުދެކެމެވެ.

ރިފަރެންސް

1.      އަލްބަރޓް ބަންދޫރާ. (1977). ސޯޝަލް ލާރނިން ތިއަރީ. އެންގަލްވުޑް ކްލިފްސް، އެން ޖޭ: ޕްރެންޓިސް ހޯލް

2.      އާމިނަތު ޝާފިޔާ އާދަމް. (2011). އިންސްޓްރަކްޝަނަލް ސައިކޮލޮޖީ، ސްތަޑީ ގައިޑް. ސެންޓަރ ފޮރ އޯޕަން ލަރނިންގ. މާލެ: ދިވެހިރާއްޖޭގެ ޤައުމީ ޔުނިވަރސިޓީ.

3.      ތޯމަސް ފެޓުސްކޯ ،ޖޯން މެކްލުރި. (2005).އެޑިއުކޭޝަނަލްސައިކޮލޮޖީ  މެކްސްސިކޯސިޓީ:ޕިއާރސަން އެޑިއުކޭޝަން.

4.      ޝަހުލާ މުޙައްމަދު .(2013) .އަންސްޓޭންޑިންގ ޕެޑަގޮޖީ އެންޑް ލާރނިންގ ތިއަރީޒްގެ ނޯޓުސް. ސެންޓަރ ފޮރ އޯޕަން ލަރނިންގ. މާލެ: ދިވެހިރާއްޖޭގެ.